Zaneto. Ben, e no ti ghe li ga messi?
Pina. Mi?
Zaneto. Ti o qualunque altro, me par che no ghe volesse tanto a servirlo subito... Corpo d'un ago rùzene... (ad Arturo) El scusa, salo, ma qua se no ghe so mi... E st'altro cossa falo de là? (Chiamando) Piero! Piero!
Arturo. Veramente, la signorina s'era prestata subito...
Zaneto. Eh! Anca ela xe una de quele signorine... Insoma, Piero!
Piero. (comparendo) So qua.
Zaneto. So qua, so qua... No ti savevi che ghe gera dele persone in botega?
Piero. Sì; e so andà de là aposta...
Zaneto. Aposta? Perchè?
Piero. Per lassarli più liberi...
Zaneto. Cossa distu, ciò... zucon?
Piero. Eh, no so zucon, no... Credeva che quela fatureta là volesse farghela la signorina Pina..
Zaneto. Ma che Pina o pana! Co no ghe so mi, ti ga ti el dover de servir i aventori e senza farghe perdar tempo... Gastu capio?
Piero. Eh, per conto mio, lo gavaria destrigà presto...
