Pagina:Trieste vernacola.djvu/75

EL MIO «BUCI»¹

I.

Co vedo 'l mio picioto² sganbetar,
Rider, corer su e zo, ciorme³ 'l baston,
Po vignirme darente⁴ a sbasuciar,
Con quel bel muso, sporco de carbon,

Co lo sento ore e ore borbotar
Quel mezo volapìk de su' invenzion,
Co 'l me vien, la matina, a stuzzigar,
Fifandome: Papà, buba, bonbon,⁵

Co 'l bati le manine per pregarme
De darghe un pochetin del mio cafè,
O una bala de zucaro smoiada,⁶

Voria star serio, ma no so frenarme,
Lo ciapo in brazzo, e là, cossa volè?
Lo basarìa per tuta la giornada.

1. Buci, vezzeggiativo d'affetto per bambini. El mio Buci, il mio bambino
2. el mio picioto, il mio piccino
3. ciorme, prendermi
4. darente, vicino, d'appresso; sbasuciar, baciucchiare
5. fifandome, piagnucolandomi; buba, bonbon, voci infantili, buba dolore, bonbon dolce
6. smoiada, bagnata nell'acqua.