Xe de moda al dì d'ancuo1
Certe cliniche speciali,
Che el docente studia el suo
E no studia i altrui mali;
Cussì el basa l'esperienza
Sula propria soferenza.
Per esempio, chi xe sordo
Studia i mali dele recie;
Dato el caso de un balordo,
Studia i ebeti e le vecie
Cussì dete rimbambide
E le mate imbestialide.
Quel che vede poco o gnente
Studia i mali dela vista,
Quando un orbo ghe va arente2
El ribalta l'oculista;
Se po el trata de operarlo
Par che el vogia divorarlo.
. . . . . . . . . . . . . . . .
. . . . . . . . . . . . . . . .
. . . . . . . . . . . . . . . .
Se per caso un amalà
Ga ogni inferno come Giobe,
Drio sta moda el vien curà
Per ognuna de ste robe,
E in un caso xe stai visti
Trentanove specialisti.
