No i va in zerca de guadagni,
I lavora per passion,
Dove i sente pianti e lagni,
Lori i core in prozession,
E per quanto un sia spiantà
I lo cura da bascià.1
Lori studia, i sta in zornada,2
Coadiuvai dal microscopio,
E cussì con un'ociada
In t'un lampo i vede el dopio;
E i sa dirne che infusori
Ghe xe drento dei tumori.
Lori studia e le so cure
No sta in sole medizine,
Gh 'entra fasse,3 bagnadure,
Qualche volta le papine;
Cossa importa del dolor
Co i le peta de bon cor?
. . . . . . . . . . . . . . . .
. . . . . . . . . . . . . . . .
. . . . . . . . . . . . . . . .
E i xe bravi, no gh'è Cristi!
Ma po, quel che no savè,
Che i xe tuti specialisti...
Feme grazia, no ridè:
Deme tempo che ve spiega;
Po' scazzème de botega.
