GH'È DEL DURO!
L’era un toco de fiola tanto bela
Che a guardarla restavi là incantadi:
I puteloti, tuti inamoradi,
No i fasèa che parlar de sta putela.
I la ciamava fior, angelo, stela,
E i ghe scrivea biglieti profumadi;
I ghe faseva intorno i spasimadi....
Ma st’altra, invece la ridea tra de ela.
Nata e cressuda in meso a la miseria,
Con una mama poco scrupolosa,
No i la credèa mai più ’na fiola seria.
E un moscardin, un giorno, persuäso
Che a darghe un boro38 lu el faria qualcosa...
La ciapado la fòrbese39 sul naso!
