Come soto un storiol
Sconde Fortuna avara
Una zogia, una perla in le scoazze,
Un'estrema belezza in molte strazze.
El concolo del pan stropa un balcon
Che no ha scuri nè veri,
Magna in pugno ciascun co' fa el falcon
Senza tola o tagieri;
Stà la famegia intorno a la pignata
A aspetar che sia coto;
Ognun beve in t'un goto,
E tuti sguazza a un bezzo de salata.
Vita vera e beata!
Un linzuol fà per sie
Che da un di a l'altro è marizà dal fumo;
Man, teste, brazza e pie
Stà in t'un, tuti in t'un grumo,
Onde se vede un ordene a grotesche
De persone, de bestie e de baltresche.
In Casa chi xe in camera xe in sala,
Chi è in sala è in magazen,
Gh'è nome un leto in t'una sotoscala
Dove in brazzo al mio ben
Passo le note de dolcezza piene;
Seben la pioza e 'l vento
Ne vien talvolta drento
A rinfrescar l'amor su per le rene.
Note care e serene!
Caro liogo amoroso!
Beltà celeste in povera schiavina!
Togia un leto pomposo
Chi ha drento una Gabrina,
Chè fa in lù quel'efeto un viso d'orca
