Che in bela cheba una gazola sporca.
In sta Cà benedeta e luminosa
Vive poveramente
Sta mia cara d'amor bela Strazzosa;
Strazzosa ricamente,
Chè con pì' strazze e manco drapi intorno
Pi' se descovre i bianchi
E verzeladi fianchi,
Com'è pi' bel co' manco niole el zorno.
Abito tuto adorno
Sora perle e rubini;
Sora beltà che supera ciascuna!
Qual se fra do' camini
Se imbavara la Luna
Che luza in mezo, tal splende la fazza
E i razi de custia fra strazza e strazza.
A sta beltà ste strazze ġhe bisogna,
Chè no se diè stroparla,
S'ha da covrir de drapi una carogna
Che stomega a vardarla,
Ma quela vita in st'abito resplende
Senza industria e senz'arte,
Mazenga in ogni parte,
Che nè lussi, nè veli el belo ofende.
Carne bianche e stupende
Al ciel nude e scoverte!
Per pompa de natura, poverete,
Andè a sto muodo averte
O colo o spale o tete,
Chè no se tagia un guanto ov'è l'anelo
Se no perchè è pì' bel questo de quelo.
Che drapi poria mai, se i fusse d'oro,
Covrir sì bei colori
