Cate. Cossa vorla che ghe diga, mi el ficarme no me piase. Par che se vada per speociar, e po' far petegolezzi; mi no, mi no.
Anz. Donca la me diga, gogio la fortuna de poderla servir in qualcossa?
Cate. Gnente, fie, adesso ve dirò. Se trata... o via, che za la lo ga indovinà.
Anz. Mi no, la veda.
Cate. Gnanca ti, Tonia?
Tonia. Se trata de Pasqualin?
Cate. Giusto de elo. Vedeu mo se le tose adesso no le xe più furbe de le vecie!
Tonia. Donca?
Cate. Donca, care fie, l'è vegnù da mi tuto scalmanà...
Anz. (interrompendo). Ciò, Tonia... cara ela, la scusa siora Cate... me par ch'el bambin pianza, va là, valo a desfassar.
Tonia. Lassè che'l pianza che'l se s-ciarirà la vose, vogio sentir anca mi.
Anz. Va là, t'ò dito.
Tonia (partendo). Sia malignaso anca el bambin, sempre la me manda via.
Cate. Cara ela, la me diga, parcossa no vorla che la puta ascolta?
Anz. Per tuti i boni riguardi, no sò cossa che la me vogia dir.
