And. El m'à dito ch'el doveva andar un momento in studio...
Emma (interrompendo con ansia). In studio? Lavorelo?
And. No! magari... in studio da un so amigo. Ma se la crede, adesso co vado fora, passo a sonarghe la campanèla, e dirghe che la lo speta.
Emma (con dolore). No'l se lo pensa gnanca per idea! Ghe domandava, cussì, perchè credeva, perchè sperava che dopo tanto tempo... ma capisso che oramai xe inutile!
And. Inutile cossa?
Emma (con amarezza). Xe inutile che spera. Oh! s'el savesse Andrea, che bruti pensieri che de le volte me passa per la testa!
And. Ma andemo! via... no la staga a far de sti discorsi. E zà che la se tormenta tanto, ghe dirò che proprio l'altro giorno el m'à dito che adesso ghe saria tornada la vogia de meterse a lavorar da novo.
Emma. E alora, perchè no se metelo?
And. (imbarazzato). Oh Dio... perchè... no savaria! ma d'altronde.... la dovaria saver che a sto mondo no xe po' miga dito che se un omo no lavora, dipenda unicamente perchè el gabia de le storie per la testa!
Emma (sorpresa). Mi no digo questo, Andrea; ma lu per che razon me falo sti discorsi?
And. Gnente, gnente.... Vogio dir che alora saria giusto che tanto ela che so mama no pensasse a çerte robe.
Emma (con angoscia crescente). Ma insomma, no capisso! Cossa intendelo de dir?... la mama...
