Ciò!... te basta che le conta, che proprio l'altro giorno, quando el ga visto la sartora che gera vegnuda a farme su quel'abito, ti sa, quelo a righete de la povera Adele, benedeta! lu el se ga messo in t'una tal disperazion, che no ghe gera nè Dio nè santi de poderlo più calmar!
Emma. Povero Daniel!
Giov. Sì, ma dopotuto el dovaria pensar che in fin dei conti son mi sola, e che se andèmo avanti de sto passo... ciò.... el perdarà l'ufizio!
Ter. Ma andemo, siora Giovana! Cossa mai se sognela?
Giov. Magari me sognasse!... Basta, no parlemo che xe megio! (salutando) Creature ve saludo! (dà un bacio ad Emma e la mano ad Andrea) (p. p.).
Ter. L'aspèta che la compagna... (Giovanna e Teresa via).
Emma (quando saranno usciti). E cussì, el me diga Andrea, xelo vegnudo al Circolo?
And. Sì, sì, la tasa! Che prima no'l voleva a tuti i costi, ma un poco a la volta el s'à persuaso e me pareva ch'el fusse anca abastanza de bon'umor.
Emma (con gioia). Oh! magari fusse vero! Perchè lu no'l sa, Andrea, quanto che mi patissa... co lo vedo cussì de poca vogia...
And. Sì, vorla che no intenda? Ma no bisogna miga che per questo la se afana in sta maniera! La pensa che in fin dei conti el ghe vol ben, e che se el xe un poco de malumor, bisogna compatirlo, povero Marcelo, el xe tanto bon!
Emma. E giusto ben per questo, mi voria vederlo sempre contento! sempre de bonumor! E cussì adesso dove xelo?
