tarà, la condurò ne la mia camara. Za mi credo, povera diavola, che la vegna per parlarme de Daniel. Infeliçe anca ela! bisogna proprio dir che a sto mondo le disgrazie no le capita mai sole. Chi gavaria mai dito... un omo de quela sorte... che in vita sua...
Emma (interrompendola). La tasa...
Ter. Va là, porta via sta roba, che almanco la veda un poco destrigà.
Giov. Se pol?
Ter. Avanti! Avanti!
Giov. Sogio vegnuda tropo presto?
Ter. No benedeta! gavemo marendà che xe un tòco.
Giov. Vedo la tola ancora pareciada.
Ter. La gavemo lassada per Marcelo, perchè sta matina Andrea xe vegnudo a torlo per una seduta al Circolo e cussì el tardigarà.
Giov. Per miracolo!
Ter. Oh sì, per miracolo perchè lu no va mai fora!
Giov. (a Emma). E ti benedeta, come stastu? Lassa che te veda. Vustu che te diga che te trovo fata più grasseta. Ohe digo... che ghe sia caso sì... che çerti malumori...
Emma. Oh, siora Giovana, cossa mai se pensela?
Giov. Caspita, cossa ghe saria da farse maravegia?
Emma. Gnente... Ma go paura che sta consolazion no la go avuda prima e no la gavarò gnanca adesso...
