Giov. Percossa? De le volte... Benchè mi go sempre visto che el Signor a chi li desidera no'l ghe li manda, mentre invece el ghe li manda proprio a chi... Basta! lassèmo là...
Ter. Qua, qua, la se senta che la sarà straca.
Giov. Se ghe dovesse dir tuto quelo che go fato stamatina no finiria più! Cossa vorla? co' quel tranvai me toca far tuto mi, pensar tuto mi...
Ter. Ghe dirò d'altra parte che aver qualcossa da ocuparse xe megio, la serve de distrazion...
Giov. Sì, ma se la savesse co' quel'omo a casa... e po' mi sola... perchè la sà, no xe vero, che semo senza serva?
Ter. Dasseno?
Giov. Cossa vorla? da la malinconia le scampa via tute. E ela co' la Rosa come se tròvela?
Ter. La tasa che finora no ghe xe mal.
Giov. Pol darse che da ela la fassa ben, perchè, za, mi lo go sempre dito che no la xe cativa... Solamente la gaveva messo suso un'aria de padronanza, co' quela che la la gaveva assistia, che ghe pareva de esser deventada la parona!
Ter. Eh sì capisso... sempre cussì! Anca da nualtri me ricordo de una serva che dopo aver assistio el povero papà, ne ga tocà mandarla via.
Giov. E po per de più la meta che ela la ghe risparmiava tuto, che mai no la ghe faceva un'osservazion...
Ter. La gera tanto bona!
Giov. Sì, ma in sta maniera la servitù se rovina. Basta! ela la la intendeva cussì... ma ancùo esser tropo bone de le volte xe mal... A proposito, ti Ema, varda che t'ò portà do o tre fiori.
