DI MAFFEO VENIERO
Signora mia, vu manizè per tuto
Drento a sto porco infina a le buele;
Donca per far salsizze e mortaele
Vu ve degnè d'un animal sì bruto?
E mi che son per vu morto e distruto
No m'avè mai tocà gnanca la pele?
Forsi che lu per quelle man sì bele
S'à sentio mai d'amor caldo un persuto?
Orsù s'amazza el porco; e mi son morto
Mile volte per vu, ma ingiustamente,
Che lu mor a rason, mi moro a torto.
Za tuttavia vel tegnì sempre arente,
E mi non go mai avù nissun conforto
De sì longo servir con tante stente.
