Pagina:Scherzi poetici di vari celebri autori italiani e veneziani.djvu/184

Da Wikisource
Sta pagina la xe stà trascrita e rileta.

     Mai fica marangon tante brochete,
Nè barbier tagia mai tanti cavei,
Nè triper tagia mai tanti buei,
4Nè scaleter fa mai tante scalete;

     Nè miedego à ordenà tante ricete,
Nè filatoio a bù tanti rochei,
Nè tanti drappi à vendù mai i Ebrei,
8Nè sartor cusio mai tante stofete;

     Nè pedanti dà mai tanti cavai,
Nè spicier fato mai tanti siropi,
11Nè nodar scriti mai tanti strumenti;

  Nè in Muran fati mai tanti orinai,
Nè in mile case ghe xe tanti copi,
14Quanti ò per vu, cuor mio, pene e tormenti.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Scherzi_poetici_di_vari_celebri_autori_italiani_e_veneziani.djvu/184&oldid=57114"