Se mai s'aldite a dir si caso brutto,
Vignando l'altro dì da le contrae,
Mi gh'era in barca, e cantava in lautto,
Puoco lontan dalle nostre Pallae,
Un zafo mariol, me trete un rutto,
E messe man a sassi, targhe, e spae;
Mi e me defisi, con la cinquedea,
Che sbueliti Tonin mallacrea.
Si vardo col cervello in tronca fila,
Devento un'anguela stupefato,
Perche Madona somegia un'anguila,
Che no se puol brancar al primo trato,
Le xe piu fiera che no fu Camila,
E assai piu dolce, che n'el mandolato;
Quando la ride averzando la bocca,
I denti si par risi in bruo de occa.
O passi sparsi, o affanni dolorosi,
O memoria ingrosà, occhi scarpeli,
O desio mallandao, sensi tegnosi,
O vita fadigà, magri cerveli,
O cuor de vacha, o spiriti tegnosi,
O pensier storno, desdolai bueli,
Dise a la Donna mia co modo e stago,
E si nol ghe rechrese ghe n'incago.
