Perche son bon minchion tutti me soia,
E la mia donna dise che son goffo,
Onde drentro'l mio cuor ho tanta doia,
Che da fastidio, e son vegnuo loffo;
Mo si scontro cupido, laro boia,
In su le galte i voio dar un toffo;
Perche le quel, che m'ha messo in bolleta
Impicao, mariol, sguerzo, zueta.
Si Buran, e Torcello fosse carta,
E fosse ingiostro, i nostri canali;
Anche i pontili, che xe a santa Marta,
Si deventasse pene, e caramali;
Si fosse man le botarghe da l'arta,
E che venisse lengue i cascavali,
E ogni sasso fosse compositor,
No scriveria, zo che m'ha fatto Amor.
Che ziova conseiar un martelao?
Perche'l fa po'l contrario co le solo,
L'hòmo xe perso siando inamorao,
Chel no cognosce un feral, da un folo,
Amor si è tanto can desgraciao,
Chel cerca sempre scavazarte el colo,
E sil te chiappa, che ti sia da rio,
Vate a confessa, e sta pur ben con Dio.
