O casa bella tanto sontuosa,
O cameretta ben seguro porto,
O letteselo mio, requie, e conforto,
O Donna infra le altre luminosa.
O contrà saoria, e gratiosa,
O forte ti m'ha fatto pur gran torto,
O ciel, perche no son'io quel dì morto?
O Dio no fostu sta mai mia morosa,
Che quando penso a quel dolce reposso,
A i cari basi, e i stretti abbrazzamenti,
Me par andar su l'arcumbè a redosso.
Fortuna ti me xe sta sempre adosso,
Ne mai ti habuo piatae di mie lamenti.
De tornar a lichar almanco un'osso.
Se no ne Amor, che cosa è quel che sento?
Che puol mo esser sto mio gran fastidio?
Onde cha i anemali, e i morti invidio,
Tanto son fuora del mio sentimento.
Perche frustarme, si no me lamento,
Da perder la pacientia a don Egidio,
E deventar murlon missier Ovidio,
Quando ghe manca un certo so contento?
Saravio mai strigao da qualche sia,
Che no me trovo in terra, gnanche in barca?
Pur ho intorno del cuor mille tormenti.
Mi e credo certo andar de curto via;
Tamen e rido, e fon parecchiar l'arca,
Per dar un liogo al fin di mie accidenti.
