Stemo Amor a vardar la nostra gloria,
Che vederemo cosse belle, e nuove
Con certe gratie, che dal Cielo piove,
Per adempir una pomposa boria.
Hor su, che scomenzemo a far instoria
Della Nimpha de Venere, che muove
Si dolce squadra, ne s'intende dove
Vorà sta Donna haver si gran vittoria.
Le onde verde l'alega, i pessetti
Va compagnando si care barchette,
Pregando i remi, che ghe daga adosso.
Le velme, le peschiere, e i canaletti
A regata ghe sona le trombette,
E Nettun và ballando tutto rosso.
Amor sotto acqua una superba rede
Si messe per piarme, e farme gramo;
Onde spogiao nudo, come Adamo,
Andì a nuar sora de la so fede.
Cho fu in mezo, e che'l giotton me vede
Chriete; è tanti zorni, che te bramo
Da chiaparte co se fa el pesce a l'amo,
Per romagnir di fatti tuoi heriede.
Ghi dissi, mo perche sti tradimenti?
Messier Cupido; a mi che son purazzo,
Che mai offesi pur un'anguella.
Lu aridando me traxè in tun fangazzo
Digando no fruar pi la to mella;
Perche no voi servir chi no na denti.
