Mille fiae o dolce, e cara ombrella,
Per haver da i vostri occhi negri, pase.
E vo proferto el cuor, ma no ve piase,
Anzi havè in odio, chi ve ne favella.
Vu fe al mio navegar una gran stella,
Ma el bon tempo, che ho si ve despiase
E sofro, che chi ama, vede, e tase
Per scapolar la debel navesella.
Si che no più Sirocho, ni Garbin,
Ma una chiara ferma Tramontana;
Che me conduga à l'honorao camin.
No me fe pi tirar si longa alzana,
Cuor de diaspro, d'azal, e serpentin;
Basta che za do anni son quintana.
Cesaro puo, che Tholomeo d'Egitto,
De fier Pompeo, ghe donete la testa,
Celando in tel so corpo, fe gran festa;
Benche in tra le persone el stesse afflitto.
E quel altro Anibal, che fo sconfitto
Dise Fortuna ti m'è pur molesta,
Ridando se strace el viso, e la vesta,
Vedando 'l tempo, che iera prescritto.
Cusi intravien à diverse brigae,
El dolce garbo, e i piaseri in pianto,
El sono in travagiosi passizari.
Perzo, si qualche volta balo, e canto,
Fago per no giazarme al Sol de instae,
Che mal sta un pover'hom sena danari.
