Za chel ciel, e la terra, el vento tase;
E che ogni anemal dorme de vena
La notte, le so stelle a torno mena,
E in tel so letto, el mar senz'onde zase.
Mi pianzo, penso, e ardo in tre fornase
Continuamente, per mia dolce pena;
Ond'ho la mente d'ira, e d'ogia piena,
Ma pensando à madonna ho qualche pase.
Perche certo colù ch'è inamorao,
Sconvien patir sette mille supplitij,
E puo, a male stente è cognossuo.
Se puol chiamarlo ben desgraciao,
Chi dorme in tela, e cerca di filicij,
E dirghe, o gramo ti, e pur mal nassuo.
O invidia nemiga de vertue,
Ch'a un bel principio me vien contrastando,
Chi t'ha mandao s'in pressa desturbando
Le mie allegrezze adesso cognossue?
Quante citae, per ti e romase nue,
Che le so zente, sempre lagremando
Va per el mondo, i so drappi fruando.
Da far pietae, ai Cingani, e le grue.
Grama descavià, seccha poltrona,
Piena de rabbia, e de mille furori,
Che fa schiavo, chi diè portar corona.
Sassina d'ogni requie, e d'ogni honori,
Brutta, gaioffa, trista maschalzona,
Cason de le mie pene, e i mie dolori.
