L'ANTITESI
Gilgio! Mo che bel nome! Un nome tal
Sarave degno d'un zentil poeta
Nato sul Pindo in scufia e camiseta
Per cantarne la vita pastoral.
Ma invece la mia stela malandreta
Ma regala più pevare che sal:
L’ingiostro che vedè in sto caramal
No risponde per gnente a l’eticheta.
Mi no so ben che razza de demonio,
Che va zirando el mondo col fiascon,
L’abia da burla travasà in sto vaso;
So che no son el fior de Sant’Antonio
Che spande per la casa odor de bon,
Ma un'erba spina che ve ponze 'l naso.
