DI
VINCENZO FOSCARINI.
Scrivo su tuto per passarla via,
Per inganar la nogia de la vita,
Ma dovarave ogni scritura mia
4Sbregar, brusar, subito dopo scrita.
Cussì a l'autor vergogna no faria
Tanti spegazzi de una pena ardita,
Che fa torto a la santa poesia,
8E va a fenir fra le scarpìe in sofita;
Ma oimè che semo tuti quanti eguali,
E dal nostro amor proprio inzinganai
11Se credemo colone, e semo pali!
Torto per questo no se demo mai,
Per questo femo al mondo dei regali,
14Che sconti staria ben come i pecai.
Da nissun mi no vogio coplar gnente,
Che za senza volerlo copiarò,
E de le cosse in rima ve dirò,
4In versi, o in prosa, scrite da altra zente.
Tanta roba se stampa al dì corente,
E tante vechie carte visto go,
E lete, e meditae, che mi no so
8Se nove idee possa vegnir in mente.
Libri novi se dà, gh'è autori novi,
Ma da novo pensieri no ghe xe,
11Se ti, o Giove, dal ciel no ti li piovi;
Dunque, cari letori, perdoné,
Se quando in testa se me rompe i vovi,
14De quel gusto dei altri li trovè.
