Pagina:Raccolta di poesie in dialetto veneziano 1845.djvu/461

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


III.


El mio can, el mio gato, el mio ponaro,
     I mii ritrati, la mia libraria,
     I mii scriti in vernacola poesia,
     4De la vita me fa dolce l'amaro.

De amici un grumo assae me tegno caro,
     Che vien spesso a trovarme a casa mia,
     Che mi trato a la bona, e in cortesia
     8Tanto se i ga la spada, che el tabaro.

Cussì da sempio, come che i me crede,
     Passo i mii zorni sempre alegramente
     11Da cristian mantegnindo la mia fede,

E qualche rara volta fra la zente
     Vestio da festa, o in arme, se me vede
     14A rider dei sapienti, e a no dir gnente.


IV.


No star a darghe libertà a bardasse
     Se no ti vol tor su qualche insolenza,
     Da dover soportar co gran pazienza,
     4Perchè ognun ga da star co la so classe.

Se nobile ti xe, persone basse
     No permeter che chiassa in to presenza,
     Nè lassar che se ofenda la decenza
     8Co moti sporchi, o con parole grasse;

Co l'ignorante no contender mai,
     Stando col rico no pianzer el morto,
     11Che lu no vol saverghene de guai.

Trascura la finzion del colo storto,
     Rispeta i grandi, i mati, e i animai,
     14Perchè co questi se ga sempre torto.


V.


No ghe xe omo che a sto mondo vegna
     Co la saviezza in testa e col saver,
     Senza l'esempio l'ignoranza regna,
     4Senza la scuola no se sa mistier.

De imitar la virtù chi no se degna
     Imita el vizio, e manca al so dover,
     Chi no studia, e no cerca chi ghe insegna,
     8Chiaro no pol esponer un pensier;

Che xe la longa pratica, xe i ani
     Che l'omo rende savio, e che lo fa
     11Tegnirse ai beni, e star lontan dai dani.

Savio deventa l'omo co l'età,
     Che vede col favor dei disingani
     14Le matae de l'umana società.


VI.


De done ghe xe quatro qualità
     Che ai relogi se pol paragonar:
     Relogio d'oro xe la puta, e par
     4Che a tegnirlo in borsin ben se farà.

La maridada in sen la vegnarà
     El relogio de piazza a presentar,
     Su sto relogio tuti pol vardar,
     8El decoro lu xe de la cità.

E relogio la vedoa xe da sol,
     Che unicamente col bel tempo val,
     11E che servir de note no ne pol.

De sabion xe relogio dozenal,
     Da usar per ogni verso che se vol,
     14La sgualdrina, che a tanti fa del mal.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/461&oldid=59440"