Pagina:Raccolta di poesie in dialetto veneziano 1845.djvu/413

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


LE DISGRAZIE.


Se vago per trovar un amalà,
     L'è andà fora de casa, el xe guario;
     Se, piovendo, d'ombrela son munio
     4Porto un intrigo, che bon tempo fa;

Se col caldo vestio me voi da istà
     Fa fredo un'ora dopo, e m'ò sfredio;
     E se de star in quiete ò stabilio
     8Son da diese persone tormentà;

Se vago in piazza perdo el fazzoleto,
     Ogni cossa che compro i me la sprezza,
     11Machio el tabaro el primo dì che 'l meto;

Son fortunà in amor co l'oridezza,
     E se vogio frezzar un bel viseto,
     14Cupido no à per mi nissuna frezza.



NATURA DE AMOR.

Se credesse col tempo d'arivar
     A posseder quel cuor che m'inamora,
     Ghe vorave el mio afeto tributar,
     4E assae felice mi sarave alora.

Ma come no me posso lusingar
     D'aver mai tanto ben da una signora
     Che se vede da molti a cortegiar,
     8Cussì a sto mio pensier dago un dessora.

Me sento, se volemo, del brusor,
     Ma spero che nol fazza in mi magagna
     11Pensando ai tanti che ghe fa l'amor.

Perchè la dona infati xe compagna
     Del fogo, che perdendo va el calor
     14Quando in picole bronse i lo sparpagna.


LA CORISPONDENZA.


Un fogio t'ò mandà, Betina cara,
     Nel qual mi te parlava de l'amor
     Che porto al to museto, e de l'ardor
     4Che m'à impizzà la to belezza rara;

Ma ti, cagnazza, a la mia pena amara,
     Mentre che mi tuto te dago el cuor,
     D'una letera toa darme l'onor
     8Gnanca ti vol? Oh ti xe pur avara!

Un fogio too lo pagaria un zechin,
     E to conservarave, tel protesto,
     11Come una zogia sempre nel borsin;

Se contentar no ti me vol in questo,
     Tornime donca el mio, che, poverin,
     14Farò ch'el serva per forbirme el cesto.



INVOCAZION.


«O musa, tu che di caduchi allori
     Non circondi la fronte in Elicona,»
     Ma che sempre ti è stada mia parona
     4Impartindome spesso i to favori;

«Le donne, i cavalier, l'armi, gli amori,»
     Per acquistar d'aloro una corona
     Mi no vogio cantar, bensì a la bona,
     8Un soneto acozzar senza suori.

Dame donca el to agiuto sta matina
     Aciò possa sortir da l'imbarazzo,
     11Che in saco mi no go tanta farina.

Perchè ti à da saver che conto fazzo
     De lodar sior Girolamo Sorina,
     14Nè se sa cossa dir d'un vis...

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/413&oldid=59484"