Me sento una smania,
Me sento un brusor
Nel cuor, ne le viscere,
4A darme dolor.
Procuro l'origine
Saver de sto mal,
Nè arivo a comprender
8La causa fatal.
Che 'l fio mai de Venere
M'avesse ferio?
I dise che perfido
12Xe in fati quel dio;
Che 'l solo so studio
Xe tesser ingani
Per veder i omeni
16In pianti, in afani.
O' visto una femena
Un dì d'acidente
A un logo che pratico
20Sentarmese arente;
Con tuta modestia
Discorso ò con ela,
E ò visto con genio
24Che assae l'era bela.
M'à piasso l'amabile
Grazioso so far,
M'à piasso el melifluo
28So dolce parlar.
Ah sì! senza dubio,
Cupido xe questo
El qual con insidia
32Colpir m'à volesto.
Epur gera solito
Vantarme che Amor
No à mai possù iluder
36El sciolto mio cuor.
Aimè! tropo incauto
Vantava sto ben;
E lu, tuto invidia,
40M'à dà sto velen;
Velen che ne l'anima
Me dà gran tormento,
E sempre più a crescer,
44Meschin, me lo sento.
Con ela trovandome
El sangue m'impizzo,
Patisso a no vederla,
48Me irabio, me istizzo;
Oh Dio! se la barbara
No sente pietà,
De mi miserabile
52Mai cossa sarà?
Se mai per disgrazia
Quel cuor xe ritroso
Finio go de viver;
56Mi moro rabioso.
Amor, Nina, me stuzzega
Perchè continua a amarte,
Ma el to contegno, o barbara,
4Me stimola a lassarte.
El to viseto amabile
Per mi xe una magia,
Ma quel to cuor volubile
8Xe pien de tirania.
Incanta el to gran spirito,
Le paroline e i vezzi,
Ma chi pol mai resister
12Ai tanti to disprezzi?
Per ti d'amor savario,
Ma senza compassion
Ti tuto a l'incontrario
16De mi ti fa sbolzon.
Ti fa de mi un ridicolo,
Che tropo xe indiscreto,
Epur senza dolermene
20Sofrirlo me assogeto.
Me bastaria sensibile
Trovarte al mio dolor,
Ma co tut'altri prodiga,
24Che a mi, ti xe d'amor.
A Nane, a Checo, a Momolo
Ti fa tanto de ciera,
E mi, più che te cocolo,
28Più ti me trati altiera.
