— Ben, dila su —
— Son qua:
Bisogna che sapiè, comare cara,
Che fina da quel dì che la rason
75M'à deslatà el giudizio,
Nè a vu, nè al zorno che volessi farme
L'onor de visitarme,
Co vostra bona grazia, n'ò volesto
Mai pensarghe un mumento.
80Timor de l'avegnir? mi no lo sento,
Ò studià sempre da putelo in su
De tor el mal e 'l ben
Tal e qual com'el vien.
Goder, sofrir senza trasporti e smanie,
85E per una secreta antipatia
Col pentimento, che xe 'l re dei guai,
Mi no so d'aver mai
Proprio abusà de gnente in vita mia.
Cussì, graziadio, son neto in utroque,
90De viscere, voi dir, e de conscienza,
Vivo (che xe dei ani veramente!)
E vivo ben. N'ò domanda mai gnente,
Nè rifiutà mai gnente a la natura.
Oe, mi v'ò dito el medico e la cura.
95Se sta riceta ga qualche virtù,
Vardeme un altra volta, e disè vu!»
Tuti sa che là in campagna
Verso l'alba senza falo
Canta el galo: cucurù:
Dona Cate da la late
5Giusto alora leva su.
Con un passo la xe in stala,
Là la monze la Lucieta
La vacheta, che savè;
La prepara po la zara
10Col so late come el xe.
L'altro zorno, andando a ponto
Co la zara su la testa
Scalza e lesta a la cità;
A bel belo un bel castelo
15La s'à in aria fabricà.
«Oh! tre lire (la diseva)
De sto late ti le trovi!
Tanti vovi ti à da tor;
Ti à da darli per coarli
20A la chioca del fator.
Mo no passa minga un mese
Che te becola el formento
Più de cento bei pipì,
Che galine grasse fine
25Te deventa in quatro dì.
Che? la volpe? Oh sì el gran caso!
A vardarle no ti spendi;
Ti le vendi, ma co ben!
Tiò un porcheto; povereto!
30Ve' co belo ch'el te vien!
L'è st'altr'ano da casoto;
Oh che lardo! el fa la goba,
I tel roba da le man;
Voi sessanta, voi setanta;
35L'è 'l so prezzo come un pan.
Ti pol torte co sti bezzi
Una vaca... ih, ih, che panza!
Oe... te avanza un vedelon;
Varda, el salta, el se rebalta
40Tra le piegore e 'l molton.»
A sto passo d'alegrezza
La fa un salto su la giara,
E la zara, tunfe... zo;
E schiao late, bondì Cate,
45Vovi, porco, vaca e bo.
Done care, tegnì streto,
Cari amici, tegnì duro
Quel sicuro che gavè.
Mo i xe beli!... ma casteli
50Tuti in aria: lo vedè.
