S'avea in t'un fiume una muger negà,
El marìo, poverazzo, desparà
El l'andava pescando atentamente
A contraria de l'acqua del torente.
5Ghè xe stà domanda: perchè cussì?
E lù a risposto: El perchè lo so ben mì.
Viva l'à sempre fato a la roversa,
Morta, no l'avarà l'usanza persa;
Ond'è più facil che la trova in suso,
10Za che de contrariarme l'avea l'uso.
Un tal se dava vanto, e sì 'l disea;
Che tute drio le done ghe corea,
Gh'è sta risposto: Oh questa po se sa
Che drio 'l pezo le done sempre va.
Da borasca in pericol se trovava
Una nave che gran pesi portava.
El piloto à ordinà che ognun dovesse
Trar via 'l peso più grando che l'avesse.
Uno de quei che avea là so muger
De butarla in tel mar fava pensier.
Ghe xe stà domanda: Perchè cussì?
Perchè l'è 'l più gran peso che go mì.
Certo che sì, che a ben pensarghe su
La più bela richezza è la virtù!
Epur apresso el mondo un omo povero;
Per virtuoso ch'el sia, l'è sempre un rovero.
Chi de le nostre done dise mal
El comete un eror molto bestial:
Se 'l cielo è vago per le vive stele,
Lo xe anca el mondo per le done bele.
Quando una casa coverta no xe,
La mostra de poder star poco in piè.
Cussì la dona che scoverta vada
Par che la vogia far qualche cascada.
Una dona burlava un certo puto
Che gera moro: Ti è un gran corvo bruto!
E questo che xe qua placidamente
Gh'à risposto cussì a sta imprudente:
I corvi core drio a ogni carogna;
Che ve vardè da mi donca bisogna.
Da certa zoventù de prima età
A un filosofo gh'è stà dimandà,
Quale sia quel rimedio che più val
Per far guarir quei che d'amor ga mal:
E lu à risposto: che la fame sola
Xe 'l rimedio che fa che amor ghe mola;
E in fati, pofardìo, co se ga fame
Se ga altro in mente che d'amor le brame.
Rodope, fia de Dario, fè amazzar
La propria nena che l'à bua a latar,
Solamente perchè la ghe criava
Che a maridarse no la se curava.
Ai nostri zorni, oh quante fie de Dario
Faria mazzar le nene a l'incontrario!
Vedeu sta bruta vechia che xe qua?
A i so dì la ga molti inamorà,
E adesso che la xe canùa e grima
No la trova nissun che più la stima:
Done bele, tolè esempio da questa,
E moderè quel fumo che avè in testa:
Va la belezza come che va el lampo,
E, vechie, no ve resta apena el stampo.
