A MADONNA
CHE AMMAZZA IL PORCO
Signora mia, vu manizè per tuto
Drento a sto Porco infina a le buele;
Donca per far salsizze e mortaele
Vu ve degnè d'un animai si bruto?
E a mi che son per vu morto e distruto
No m'avè mai tocà gnanca la pele?
Forsi che lu per quele man sì bele
S'à sentì mai d'amor caldo un persuto?
Orsù, s'amazza el porco; e mi son morto
Mile volte per vu, ma ingiustamente,
Che lu muor a rason, mi moro a torto;
Lu tutavìa vel tegnì sempre arente,
E mi no go mai avù nissun conforto
De sì longo servir con tante stente!
