Pagina:Poesie veneziane del conte Francesco Cestari.djvu/19

E la Morandi ⁹ estatica
     Restando in quel momento,
     No ga fenío un gorghegio,
     Sospesa dal contento
     Che tuto quel Teatro ga provà,
     E che in frequenti eviva v'à mostrà.

Se tuto quanto un popolo
     Podè, Zermana mia,
     Far deventar fanatico;
     La vostra compagnía
     Pensève quanto mai Nu ¹⁰ sospiremo,
     Nu, che d'apartenerve se vantemo.

Me fazzo, sì, l'interprete
     Dei voti d'un Nevodo:
     De quei de do Famegie ¹¹,
     Che d'amicizia el nodo,
     Più de quelo del sangue, unite tien,
     E che reclama co sti versi un ben ¹².

Un ben, che più in arbitrio,
     De Vu no xe 'l negarlo;
     Un ben, che Vu prometerlo
     Gavè podesto, e farlo
     Ne la stagion passada ne disevi,
     E replicatamente lusinghevi.