Le Pute del Piovan de quando in quando
Chiamae dal bon umor de sto batochio
Le sbrissava al balcon de contrabando
E sborio furbo ghe strucava l'ochio
In testa un gran progeto ruminando
Per vardarghe più in suso del zenochio
E per farghe sentir a Beta e a Cate
Che sà sborio giustar pote e zavate.
Gera ben natural che in vicinanza
Stando costù del Barba a far mestier
Dei so strapazzi la vilana usanza
El dovesse prestissimo saver;
Se gà donca indurio sotto la panza
A Sborio l'istrumento del piacer
E l'à dito fra lù, vilan de Barba
Mì te farò, per Dio, bever la garba.
Sentì che furberia! sentì che rosto!
El se veste de negro, el cambia ciera,
El se mete in peruca, e là in quel posto
Dove atento ai so afari el zorno el gera,
(Ne l'ora ch'el Piovan sentà co l'osto
Svodava quatro grosse in prima sera)
L'intona col sordin o storte o rote
Done se lo volè, quà el conza pote.
De le do pute in camera serae
Presto a le rechie ste parole zonze,
Le voria pur, ma le stà là impalae
Che vergogna e pudor el cuor ghe ponze;
Lù ripete la zolfa, ele incantae
Deciderse no sà, ma in fin da gonze
Le core a basso, e le ghe dise a pian
Venì quà, Conzaor, quà dal Piovan.
Pagina:Poesie e satire di Pietro Buratti veneziano.pdf/9
Sta pagina la xe stà trascrita, ma la gà ancora da vegner rileta.