Sborio se volta, e zà ghe vien un sbrufo
De riderghe in tel muso a le Nezzete,
Ma in aria da bon omo, e da martufo
El so sofega in cuor le barzelete,
Trema le pute, ma no trema el Bufo
Pensando a quei bei culi, e a quele tete,
E zà de su con ele al gran cimento
Le dà el caenazzo e le lo sera drento.
Cate voria pur dir, ma non la trova
Per quanto che la cerca la parola,
Che la metua del Birbo afato nova
Impalidir la fa, povera fiola!
Beta più svelta de parlar se prova
Ma la chiacola o Dio! ghe mor in gola,
Sborio se gode assae de l'imbarazzo
E a pian pianin ghe và tirando el cazzo.
Finalmente la prima a farse cuor
Xè Beta che ghe mutega cussì,
El Barba.... el Dizionario.... Conzaor
Voria pur dirve... Cate parla tì....
Gavemo storta... o Dio! che disonor...
Ma vù se del mestier... vù zà capì
Vardar... tocar... oibò faremo nù...
Che secreto gaveu?... disè pur sù.
Via le se meta in quiete Zentildone
Risponde Sborio, in ton da polegana,
No le gabia paura, le sia bone
Ch'el secreto consiste in t'una cana
Da mì provada zà con tante done
Che son solito a dirghe toca e sana,
Ma senza vardar prima el fato mio
Drezarghela no posso, no per Dio.
Pagina:Poesie e satire di Pietro Buratti veneziano.pdf/10
Sta pagina la xe stà trascrita, ma la gà ancora da vegner rileta.