Ma come Providenza per le Bele
Slonga sempre dal ciel tanto de brazzo
E che d'emulazion prova per ele
Nobile gara el birbo, o el visdecazzo,
Sentì con che grazieta a ste putele
Da chirurgo gà fato un bel regazzo
Che del Piovan dal noto intercalar
Voleva un bon partio per lù cavar.
Col so picolo banco provisorio
Gera da quei contorni capità
De nome Nane, e de cognome Sborio
Un zovene nel fior de la so età,
Che zirava per tuto el teritorio
Fermandose ora quà, ora de là,
Alegro, bontempon, dreto de fondo,
Come chi viazza e chi sgambeta el mondo:
Contrassegni parlanti e spia sicura
De un cazzo fotidor che mai no fala
Gera un naso acquilin de gran misura,
Ciera un poco bronzina e un poco zala,
Folti e negri i cavei, la barba scura,
Ochio vivo, bel peto, e larga spala,
Brazzo robusto, corpo snelo e suto
E un per de bone gambe sora tuto.
Coi so atrezzi costù per acidente
Del Paroco piantà soto i balconi
Barzeletando el zorno alegramente
L'incantava de buzzere i cogioni:
E come per far bezzi, e chiamar zente
Una gran calamita xè i baroni
Man no gaveva Sborio che bastasse
Tuti a servir per quanto el zavatasse.
