Pagina:Marco e Tòdaro.djvu/212

12E dite ste parole incontro a ela,
    Co' un goto grando in man de vin torchià,
    El ghe seguita a dir: «Ma via, giustèla,
    Se anca un fià de brusor te xe restà:
    Che no te veda più, mama mia bela,
    Cascar in man de Giove invelenà: ¹
    Perchè alora, col ben che pur te vogio,
    L'agiutarte per mi saria un imbrogio.

13Star contro a Giove chi pol mai de nu?
    Un altro dì che in mente me son messo,
    Mama mia, de difenderte da lu,
    (Me lo ricordo come fusse adesso!)
    Chiapandome el piè drito, de quassù
    El m'a' slanzà cole so man lu stesso;
    E a far quel capitombolo solene
    Go consumà vintiquatr'ore piene.

14Go petà drento a Lenno, in quel momento
    Ch'el sol andava giusto a colegarse.
    Che fugazza ² che gera e fora e drento,
    E con che fià, se poi imaginarse;

1. [p. 216]invelenà — incollerito, invelenito.
2. [p. 216]fugazza — stiacciata. Figuratamente dicesi di ogni cosa che o per caduta o per peso sovrapposto siasi goffamente sformata.