VI.
Nina, montemo in gondola, da'l mar
Vien su 'na bavesela che consola;
Percossa star imusonada e sola
Come 'na vecia striga a brontolar?
Che gusto, Nina mia, farse la guera
Sti quatro zorni che se vive in tera?
El çielo xe stelà, l'aqua xe queta,
Monta, tesoro mio, monta in barcheta.
VII.
Co vegnarà l'inverno, anema bela,
Sentai1 staremo al fogo tuti do;
E mi te contarò qualche storiela,
Qualche fiaba d'amor te contarò.
Ma no. S'anca viene neve e supia el vento,
El fredo, Nina mia, mi no lo sento.
Sento sempre l'avril co te go arente,
La primavera tepida e fiorente.
- ↑ Seduti.
