IV.
La mia morosa l'è 'na maravegia,
Nata a Castelo disdot'ani fa.
Più de un palazzo val più de una regia
El so vecio tugurio screpolà.
La ga la drezza bionda e l'ocio nero,
E la va via co' portamento fiero.
Se la vedè, fioi mii, voltè la testa,
Perchè a fissar el sol orbi se resta.
V.
Stanote m'ò insognà, tesoro mio,
Un sogno orendo, un sogno da morir.
Quatro bechini cole torse a drio,
Che te portava, Nina, a sepelir.
Supiava el vento forte e scravazzava...1
Mi, come un mato, pianzeva e zigava.
Zigava... e m'ò svegià. T'ò visto ti...
Nina, per quelo t'ò strucà cussì.
- ↑ Pioveva a dirotto.
