VIII.
Tornarà, tornarà la primavera,
I fiori tornarà, Nina, a sbociar,
Andaremo a torsion1 matina e sera,
In gondola andaremo a respirar.
Se perdaremo, Nina, in mezo al scuro,
Lontani dala zente e dal sussuro,
e Bepo, el barcarol, non farà casi,
Co'l sentirà la musica dei basi.
IX.
Geri a Samarco un frate predicava
Contro i morosi e contro la passion,
E mi - senza badarghe a quel mincion -
Davanti a la madona te adorava.
E me recordo che viçin de ela
Ti geri ti la vergine più bela.
E che tuta la zente, omeni e done,
Vardava de più ti che le madone.
- ↑ In giro.
