E mi la stava a contemplar. Oh cari
Estri che quela testa m'à inspirà,
11Dove sè andai che me sè tanto avari?
E adesso, co tramonta el sol d'istà,
(Povero cuor, no femo dei lunari!)
14Xelo averto el balcon, xelo serà?
6
Ma no stemo a pensarghe. Vien, Giaçinto,
Vien a Roma co' mi, vienme a trovar.
Ziraremo anca qua, sastu, e l'istinto
4Ne portarà sul fiume a spassizar.
Sule rive del gran Tevere, tinto
De sangue un dì, come sul nostro mar,
Se verzaremo el nostro cuor convinto
8Che la quete sul mondo abia a regnar.
Se contaremo ancora i nostri afani,
I sogni che ne xe restai fin qua,
11E i nostri bei ricordi veneziani.
A passo a passo, po, soli soleti,
Fra le rovine eterne se andarà
14A desmissiar filosofi e poeti.
