L’altra che ghe voleva ben assae
Che ghe stava coi occhj sempre adosso
De tuti i mj sospeti gentilmente
M’ha volesto provar che go rason.
Ma sta povera Puta!... Oh mi son mato,
E a far giudizio ò da stentar un pezzo!
Basta. Vado a giustarla se ghè caso.
Prometerò non esser più zeloso,
Pregherò, zurerò; ma se me nasse
Qualche novo sospeto? Oh se l’è vera,
Chi nasse mato no guarisse mai!
Lug. GNancora el vien sto Sior?
Luc. Ma, cara ela
Mi no so cossa dir, lo compatisso.
L’acqua xe fina drento dele porte.
Dove ch’el sta, lu no ga riva in casa:
Xe quatro dì che l’è vegnù a Venezia:
Nol sa gnente, nol ga nissuna pratica.
Me par che l’abia d’esser intrigà;
E mi credo, che a lu più d’ela istessa
Ghe despiasa seguro.
Lug. Manco mal.
Ma l’à da far el so dover, e quando
Se promete vegnir, cascasse ‘l Mondo
