No xe permesso de mancar. Ger sera
Ghe l’ò dito e stradito: domatina
Sior Conte, no falè: vegnì a bonora
E quanto più abonora che podè:
Da mio Cugnà vogio che andemo insieme
Che s’à da far le nozze de so fia.
Dè ordene stassera co’ andè a casa
Che i ve desmissia a tredes’ore al più:
Le disissete xe sonae: gnancora
Che sielo maledetto, no l’è quà.
Luc. Ma siora, a tredes’ore no xe dì,
No se ghe vede gnente. A disissete
Sona terza, e la xe ora discreta.
Se l’acqua dasse zoso un tantinin
Lu presto saria quà. Oh la va, Siora,
La va a bonora quanto che la vol.
(Vorave meter ben, povero diavolo,
Che ghe casca dei mezi ducateli;
Ma co sta mata che ghe magna i occhi
Ogni momento, poco posso far.) da se.
Lug. S’el vegniva a bon’ora come mì
Gò tanto predicà, l’acqua no gera
Tant’alta, s’averia podesto andar.
Adesso val a cata, se se pol
Cole barche passar soto dei Ponti.
E tuto causa quela maledeta
Testa che no vol far quel che se dise.
Luc. Ma poverazzo, come mo podevelo
Imaginarse che dovesse l’acqua
Crescer tanto da farlo star in casa?
Me par, gramo, de veder, ch’el se brusa
Per no poder vegnir!
