Caro Zaneto, ressolveve: mì
con commozione.
Son za disposta e pronta a secondarve;
Tagemo a mezo el filo dela nostra
Iminente comun desperazion:
No se semo infelici uno con l’altro.
Semo a tempo, lassemose, che alora
El cuor in quiete mi ve lasserò:
Vù l’onor mio no insulterè cussì.
parte piangendo.
Zan. O Povereto mi! coss’oio fato?
Povera Puta! la me fa pecà!
So anca mì che ghe fazzo un’insolenza
A sospetar cussì. Coss’oi da far?
Un cuor mi go, che sielo maledeto,
Nol me lassa un momento star in pase.
Se podesse cambiarmelo, magari!
Ma no ghè caso! Questa xe la terza
Volta che m’inamoro, e sò sta sempre
Sempre zeloso! È vero che no ghè
Da far confronto da que altre a questa
De carattere e cuor diversa assae.
La prima a forza de farghe la spia
L’ò vista un dì, che... basta, la m’à fato
Desiderar dasseno d’esser orbo.
