O povereto mi, come saràla?
Anz. Zaneto, digo!.... come sopra.
Zan. No savè dir altro?
Lo so anca mì che gò nome Zaneto
Ma no vorave che per causa vostra
I m’avesse pò un zorno a chiamar Luca!
Anz. Oh son mo stufa, che non posso più
De soffrir tuto el dì tante insolenze,
tant’indegni strapazzi, e vilanie,
Sior Zaneto, da vù. Penseghe ben:
E no ve immaginè, che me despona,
Sol perchè me sposè senza la dote,
A volerme sempre taser, e sofrir.
Una Puta d’onor prima de tuto
À da stimar se stessa, e ‘l so decoro:
E finchè la xe in tempo d’evitar
La desgrazia magior che ghe sovrasta,
Ch’è quela d’un Mario senza giudizio
Che con mile sospeti tuto el zorno
L’oltragia, l’avilisse, e insegna ai altri
A perderghe ‘l respeto, l’à da far
Finchè in tempo la xe, un’onorata
Forte ressoluzion. Zaneto, mì,
No velo scondo, mi ve vogio ben:
I mj Parenti e i vostri za lo sà
E deboto lo sa tuta Venezia.
Se ve sposo, lo fazzo per amor
Per speranza con vù d’esser felizze
Ma se sentì de no poderve presto
Liberar de sta vostra zelosia
Per la qual mile vedo in lontananza
Spasemi da soprir pene d’Inferno;
