Anz. Chi l’à dito?
El mio bisogno el gò.
Zan. Car’Anzoleta,
Sa tuto el Mondo come ch’el ve trata.
E se sà, che, tra l’altre cosse, spesso
Ve manca da magnar.
Anz. No è vero, Sior.
Mi no me manca gnente, e voria ben
Saver chi v’à contà tute ste cosse!
Come podeù mai crederle, se mì
Gnancora sò de averme lamentà?
Zan. Eh Giulio, Pasqua...
Anz. Colù là xe un furbo
Che no fa el so dover, che impertinente
In ridicolo mete el so Padron
Perchè...
Zan. Nol ghè dà un bezzo de salario.
Anz. Come donca ghe stalo se xe vero?
E a colù ghe credè? Ghe credè a Pasqua
Che no capisse più quel che la dise,
E messa mi al confronto de sta zente
L’insolenza me fè de dubitar?
Zan. Eh Anzoleta, conosso el vostro cuor
So de quanta virtù vù se capazze.
Basta, vero, o no vero l’è fenia.
No avè più da patir.
Anz. Ma, ve lo replico,
De mio Padre parlè come se deve
O tra de nu ghe sarà sempre....
Zan. Zito!
Par sta volta scuseme, e assecureve
Che par sta parte non averè de mì
