Zan. Me la son dada subito per diana
C’ò visto averto el Canevin; e Giulio
Con un’altro che n’ò destinto ben
Ma che sarà sta certo Sior Nadal,
Che i stava c’una sessola butando
Via l’acqua dala porta e dal balcon.
Figureve, el sarà sta desperà.
Avaro maledeto! Sula forca!
Nol posso tolerar.
Anz. E quante volte
Vel ogio mo da dir, che de mio Padre
No voi co sto desprezzo che parlè?
con serietà.
Se l’amor che per mì disè de aver
A respetarlo no ve insegna, almanco
La creanza ve l’à, Sior, da insegnar.
Se Avaro lo credè, se l’avarizia
Un vizio la ve par che renda un’omo
L’ogeto del comun riso e desprezzo,
Profiteghene, Sior, senza oltragiar
Con vilanie, con imrpoperj el Padre
Sul viso d’una fia che lo rispeta.
Zan. De diana! Andè ben presto zo dei bazeri.
Alfin po, cara fia, se qualche volta
Digo qualcossa, el digo...
Anz. Troppo spesso
Ve vien ste vogie, Sior come sopra.
Zan. Alfin el digo
Car’Anzoleta solo per amor.
Pensar che vostro Pare da Regina
Ve poderia far star, e ch’el ve lassa
Bisognosa de tuto......
