De caminar, e m’ò rimesso subito.
Ma giusto, quatro passi, se pol dir
Lontan de quà, zo del secondo Ponte
Dove l’acqua xè fin a meza cale
Ò trovà un forestier con un spadon
Che no feniva mai, che come mì
Coreva a precepizio. El me voleva
Andar avanti, e za el me gera andà.
Chi sa mi ò dito alora tra de mì
Percossa che sto Sior gà tanta pressa?
E se xe mo la fame che lo spenze
E nol core che per torse un zaleto?
Mi che vado a trovar la mia Morosa
Che ancuo dopo do àni de sospiri
À d’esser mia Muger, ghe starò in drio?
Sior no! Co sto pensier me fico avanti,
Lo chiapo, e ghe son subito ale spale!
Ma giusto in quel momento che lo vogio
Superar, un facchin me vien incontro,
Ghe dago logo parchè ‘l passa, e intanto
Me trovo tra le gambe quel spadon,
Me vogio sbarazzar, ma sbrisso, e zò,
Dago una stramazzada maledeta.
Anz. Ve seù mò fato mal? con passione.
Zan. Se mene avesse
Anca fato, a sentirmelo da vù
Con tanta bona grazia a domandar
con dolcezza.
In tun momento el me saria passà.
Coss’è de Sior Nadal?
Anz. El tarocava
Za un fià, che ghè andà l’acqua in Canevin.
