Ch’anca mi m’ò sposà col mio Gregorio!
Poverazzo! el xe morto, e morto zovene;
El m’ha portà via el cuor, co dise quelo!
Co vedo sior Zaneto, tal, e qual,
I pareria fradei: dò giozze d’acqua,
Un pomo in do spartio!... D’amor savè
El m’ha sposa d’Amor! piange.
Anz. Via cara Pasqua
Lassevela passar. Xe tanto tempo!
(Poverazza! la va alla sensa!) da se.
Pas. Oh fia,
No xe po miga tanto, e col m’à tiolto
Dirò, co dise quelo, ger’ancora
Da late se pol dir! Ghe vol pazienza!
piange.
Oe, gnancora son morta! Un dì, chi sa!
Chi sa, che un dì no me resolva... basta...
ride.
Vago a impizzar el fogo, che xe tardi,
E po a laorar per vù, co dise quelo. parte.
Anz. POvera vecchia! La me fa pecà!
No ghe rege el cervelo, e la prencipia
A no capirse, e a no farse capir.
Passa el tempo per tuti, e per le done
El core a precipizio! In tun momento
