Pas. Xe cressù l’acqua;
Ghe l’ho dito, ch’el stava za criando
No so perchè o con chi, che no ghe gera
Anema viva: e quando gò contà
Ch’el Canevin xe quasi soto acqua,
El s’ha messo a sbragiar, co dise quelo,
Ch’el pareva che soimi; e l’è andà via
Criando ajuto! Son stà svalisà! piange.
Oe! Per mì no so gnente vedè, fia! ride.
Anz. Xe cressù l’acqua? Xela alta assae?
Pas. De diana! Se vedessi! Oe, za un’oreta,
Quand’ò averto el balcon dela cusina,
Russava el scuro el selze d’una Barca
Che gera soto. Oh semo bassi assae!
Dirò, co dise quelo, qua ghè el Pergolo.
Averzì, fia, che vederè. ride.
Anz. Ve credo.
(No voria, che Zaneto dala pressa
De vegnir quà, s’avesse da bagnar!
El xe cuss’impetuoso! Figureve!
Le caene nol tien! el pol sbrissar!
El pol farse del mal!) da se.
Pas. Ma! piange.
Anz. Cossa ghè?
Pas. Eh gnente. si asciuga gli occhj.
Anz. Via disè, cossa gavèù?
Pas. Gnente ve digo, fia. come sopra.
Anz. Vogio saver.
Pas. Ve fè novizza vù! come sopra.
Anz. Ben, e cussì?
Ve sughè i occhi? Cossa mo vol dir?
Pas. Me vien in mente, cara fia, quel dì
