El grio l'è quela bestia coi corneti,
Che g'à le ale tute lavorade,
Che g'à la sega su par i sgarleti,
E che in quel posto... g'à do coe rissade.
In boca mi no so: 'l g'à du coseti...
Che se i te ciapa, oh Dio che morsegade!
L'è nero 'mparmiga con dei gialeti;
No 'l dorme quasi mai ne le notade!
E par sto moretin in primavera
Ve canta el so «Gri-Gri» sul bel pra verde,
Con la paieta, insenocià par tera,
Gh'è quel che de le ore atento 'l perde,
Parchè — secondo mi — l'à vossù Dio,
Che l'omo sia l'amigo pur del Grio.
Anzolin da la Jazza
St'ano i fa 'l Carneval1, Dio, che ristoro!
Quando ghe penzo za no me par vera,
Pensar che l'è da 'mprima de la guera
Che i pori veronesi no i g'a sòro... 2
Torna quela pignata dal gran oro
Che in sima i cari co i Marenghi gh'era
La piassa de San Zen la torna in fiera,
E i gnochi, i sbrissia in pansa da par loro.
Le Cavalcade... i Cori.... e la Regina
Ne sfilarà davanti a son de banda!
De sera, ghe sarà la Cavalchina,
La Veglia del comercio sarà granda,
Le Mascarine in Bra come farfale;
...E, a bonoreta, tacarà le bale!!
Anzolin da la Jazza
