«.... Canto le piazze e le contrade
E le braure e le briconerie,
I zughi, le barufe e le sassade,
E pugni e carsajade e furbarie
De tanti boni cai de çitadini,
Che forma ’l primo fior dei berechini.
Appena i ga çinqu’ani, puteleti,
Che la so mama la li manda a scola,
In pochi giorni, impara de i zugheti
E de le paroline che consola;
Prima de 'l paternostro e l’alfabeto
Passa de i mesi e forsi qualche anéto.
Ma intanto i so compagni che ga pratica
I sbrega i beçedari e i gli amaestra
De ’l galiotismo in tuta la gramatica;
Va pene e libri zo par la finestra,
E ’l povaro Maestro el ziga el sbraja:
— Tàsitu, berechin?.... fermo, canaja!.... —
— L'è sta lu; le sta ti; se fa scompilio,
Tien man ferma ’l Maestro, ma i scolari
I ghe tien fermo al ciasso e bisibilio,
E svola in alto i libri, i calamari;
E prima po’ che sia finì la festa
Ghe capita qualcossa su la testa!....
Matio Zocaro
In alto slusa 1 un sol da primavera
Squasi anca lu el fasesse Carnevai;
La zente l’è in boresso 2 e, al mancomal,
Tra i spassi e ’l ciasso i vol che vegna sera.
In piazza Bra gh'è i cari 3, e i mostri i spera
De ciapàr de i confeti o un portogal,
Che buta via quei mati al Bacanal,
E i core in sambra 4 che no ghe par vera.
