— Mama, mama, ’na viola! — Oh, elo vera?! —
Da un granar i sigava ai primi ciari.
’Na rondena vegnù di là dai mari
L’à risposto: ci-ci....: l’è primavera.
E rossi e bianchi: rose e mandolari;
E verde novo l’à vestì la tera.
Tuto ride: se sveja: tuto spera;
Tuto dise finidi i giorni amari.
Basi e promesse! Taca la rosària [1].
Co l’oro de sto sol scapa i pensieri
E ’na canson la zúgola [2] par aria.
Zo i puleleti i fa bossòlo tondo. [3]
Eco el doman! Mi son ormai de ieri,
Ma rido istesso: anco l’è belo el mondo!
Gianni Monicelli
El reatin l’ea scomesso con l’aquila a ci sgolaa [5] pì assè in alto. Ela la se tegnea, gnanca da dirlo, sicuro de vensar. Ma el reatin, quan’ l’è sta ’l momento de la partenza, senza che l’aquila la se n’incorsa [6] el ghe monta sora la schiena.
Ela la se taca a sgolar, e la sgola, la sgola...
Quand’ l’è stufa la se ferma, e la’ arda se la ’edi [7] el reatin.
Lu alora el ciapa ’n alto el volo:
— Ci, ci, ci, ci, el fa; mi son qua sù, el dise.
E l’à venso la scomésa.
Questa favola fu messa in versi bellissimi dal poeta Siciliano Giovanni Meli: «L’aquila e lu riiddu».
