Iª — SAN ZEN E EL DIAVOLO.
Su la piassa de S. Zen ’na volta gh’era ’na gran vasca a forma de copa, che serviva ne i tempi antichi per far (cussìta i dise) el bagno. S. Zen che, anca alora, l’era tegnù in considerassion de un gran Santo, visto el demonio, el l’ha ciamà par nome e el ga dito: To’ su quela vasca che sta lì, e pórtela ’n ciesa. El diavol el l’à ubidì; e ’l s’à cargà su le spale la vasca e el l’à portada nel sito che se vede anca adéso 1.
IIª — RE PIPINO E LA SUA TOMBA.
Re Pipino, fiol de Carlo Magno, l’è ’na figura conossúda ne la contrada de S. Zen, parchè i conta ch’el sia stado lu quelo che ga dà più lustro de tuti a la Ciesa, la qual conserva ’l corpo del patrono de Verona; e pur savendo che Pipino l’è stado sepelido a Milan, i Sanzenati i se ostina a dirghe ai foresti che Pipin l’è stà sepelido qua in ’na tomba — e anca i ghe la mostra, — tomba che se cala nel prà a drita de la Ciesa, dove se inalza, belo, quadrato ’l Campanil.
IIIª — CASTELVECIO EL GA ANCA LU LA SO STORIA 2.
In tei tempi andádi, quando gh’era guéra, se pol dir, giorno par giorno, la mojer de l'ultimo dei Can de la Scala, che l’era molto bela e anca molto capriciosa, par schivár de ésar fata prigioniera dai nemiçi vincitori, la s’ha calado zo ne l’Adese da la tore più alta proprio sora ’na barcheta che lì visìn la le spetava; e poi via, chi s’è visto s’è visto!....
- ↑ Si osserva ancora l’intaccatura: il diavolo l'ha presa coi denti per trasportarla entro la Chiesa.
- ↑ Il fatto è storico, provato da documenti che ne fanno fede. Risale all'epoca in cui Gian Galeazzo Visconti, signore di Milano, minacciava gli Scaligeri ed il timore indusse le donne alla fuga. Samaritana Da Polenta moglie di Antonio della Scala, ultimo degli Scaligeri, ricoverata nello stesso Castello, vedendone imminente la caduta, si calò dal torrione o mastio fin verso l'Adige, ove l'attendeva una barca. Così riuscì a porsi in salvo ed a ricoverarsi presso il cognato conte di Brandeburgo.
